ⵉⵣⵔⴼⴰⵏ. ⵜⵉⴷⵔⴼⵉⵏ. ⵜⴰⵎⵢⴰⴳⴰⵏⵜ.

ⴰⵙⴰⴽⴰ ⵏ ⵓⵙⵉⵣⵡⵔ, ⴰⵙⴰⴽⴰ ⵏ ⵓⵙⵏⴼⵍ ⴷ ⵓⵙⴰⴽⴰ ⵏ ⵜⵓⵚⴽⴰ

ⴰⵔ ⵉⵙⴼⵓⴳⵍⵓ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⵙ ⴰⴷ ⵙ ⵓⴽⵜⵜⵓⵢ ⵡⵉⵙⵙ ⵙⵎⵎⵓⵙ ⴷ ⴽⵕⴰⵎⵔⴰⵡ ⵏ ⵓⵙⵔⵙ ⵏ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ, ⵉⵜⵜⵓⵙⵔⵙⵏ ⴰⵙⵙ ⵏ 8 ⵎⴰⵢⵢⵓ 1990, ⵢⴰⵜ ⵜⵙⵓⵔⵉⴼⵜ ⵉⴳⴰⵏ ⵜⴰⵎⵙⵉⵣⵡⵔⵜ, ⴳ ⵓⵎⵏⵉⴷ ⵏ ⵉⵎⵏⴰⴹⵏ ⵉⴳⵔⴰⵖⵍⴰⵏⵏ ⵏ ⵓⵙⵏⴼⵍ ⴷ ⵓⵙⵏⴰⵎ.

ⴰⵙⴼⵓⴳⵍⵓ ⵙ ⵓⴽⵜⵜⵓⵢ ⵡⵉⵙⵙ 35 ⵏ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⴰ ⵉⵙⵔⵙ ⵍⵎⵖⵔⵉⴱ ⴽⵕⴰⴹ ⵉⵙⴳⴳⵯⴰⵙⵏ ⵉⵙⵎⴷⵏ ⴷⴰⵜ ⴰⴷ ⵖⵜⵙⵏⵜ ⵜⵎⵜⵜⴰ ⵉⵎⵓⵏⵏ ⵉⵎⵏⵣⴰⵢⵏ ⵏ ⴱⴰⵔⵉⵙ ⵉⵙⵏⵎⴰⵍⴰⵏ ⵜⴰⵙⵉⵎⴰⵏⵜ ⵏ ⵜⵎⵔⵙⴰⵍ ⴰⴷ, ⵉⴳⴰ ⴰⵡⴷ ⵜⴰⵎⵍⴷⴰ ⵉ ⵓⵙⴼⵓⴳⵍⵓ ⵙ ⵜⵣⵉⴳⵣⵜ ⵏ ⵓⵙⵏⴼⵍ ⴰⵎⵔⵙⴰⵍ ⴷ ⵢⴰⵏ ⵙⴳ ⵉⵙⵔⴰⵙ ⵉⴽⵙⵡⴰⵜⵏ ⴳ ⵓⵙⴰⴽⴰ ⵏ ⵜⵓⵚⴽⴰ ⵏ ⵓⵏⴰⴳⵔⴰⵡ ⴰⵣⵔⴼⴰⵏ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ.

ⵙ ⵜⵎⵍⴷⴰ ⴰⴷ, ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵎⴰⵙ "ⵉⴳⴰ ⵓⵙⴼⵓⴳⵍⵓ ⵙ ⵓⴽⵜⵜⵓⵢ ⴰⴷ ⴰⵙⴼⵓⴳⵍⵓ ⵙ ⵓⴱⵓⵖⵍⵓ ⵏⵏⵖ ⴰⵎⵔⵙⴰⵍ, ⴷ ⴰⵡⴷ ⵙ ⵜⵉⵍⴰⵍⵜ ⵏⵏⵖ ⴳ ⵓⵙⴷⵓⵙ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⴽⵔⴰ ⵙⵉⵙⵏ ⴳ ⵢⴰⵏ ⵍⵎⵖⵔⵉⴱ ⵉⵜⵜⵏⴼⴰⵍⵏ ⵙ ⵜⵡⵉⵍⴰ ⵉⵣⴷⵉⵏ ⴷ ⵉⵙⵓⵍⵏ ⴳ ⵓⵎⵏⵉⴷ ⵏ ⵉⵎⵏⴰⴹⵏ ⴷ ⵉⵙⵏⴼⵍⵏ ⵉⵎⴰⴹⵍⴰⵏⵏ".

ⵜⵔⵏⴰ: "35 ⵏ ⵓⵙⴳⴳⵯⴰⵙ… ⴰⵙⴰⴽⴰ ⵏ ⵓⵙⵏⴼⵍ ⴷ ⵓⵙⴰⴽⴰ ⵏ ⵜⵓⵚⴽⴰ, ⴰⵙⴰⴽⴰ ⵏ ⵓⵎⵓⵜⵜⵉ ⵙⴳ ⵜⵎⵔⵙⵍⵜ ⵜⴰⵎⵙⵎⵍⴰⵏⵜ ⵖⵔ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵜⴰⴷⵙⵜⴰⵔⵜ ⵙ ⵜⵙⵎⴷⵢⴰⵜⵉⵏ ⵜⵉⵏⵎⵏⴰⴹⵉⵏ ⵏ ⵡⴰⴷⴰⵙ, ⴰⵙⴳⴳⵯⴰⵙ ⵏ 2011, ⴷⴼⴼⵉⵔ ⵎⴽⴰ ⵖⵔ ⵜⵎⵔⵙⵍⵜ ⵙ ⵜⵡⴰⵍⴰ ⵜⴰⵣⵔⴼⴰⵏⵜ ⵜⴰⵎⵉⵔⵉⵡⵜ ⴷ ⵜⵖⵣⵓⵔⴰⵏⵜ ⵙⴳ 2018", ⵜⵙⵉⵙⴼⵉⵡ ⵎⴰⵙ "ⵉⴷⵔⵓ ⵍⵎⵖⵔⵉⴱ ⵙⴳ ⵉⵙⴳⴳⵯⴰⵙⵏ ⵉⵎⵣⵡⵓⵔⴰ ⴳ ⵓⵙⴰⴽⴰ ⵏ ⵉⵙⵏⴰⵎⵏ ⵉⴷⵙⵍⴰⵏⵏ ⵉⵎⵅⴰⵙⵏ ⴷ ⵉⵏⴱⴰⴹⵏ, ⴽⴽⴰⵏ ⴰⵎⵓⵏ ⴳ ⵓⵙⵎⴽⵍ ⵏ ⵉⵣⵔⵉ ⵏ ⵜⵕⵥⵉⵢⵉⵏ ⴷ ⵓⵙⵔⵙ ⵏ ⵓⵙⴰⴽⴰ ⵏ ⵜⵉⴷⵜ ⵏ ⵓⵙⵓⵎⵓ ⴷ ⵓⵎⵙⴼⵔⵓ, ⵏⵏⴰ ⵏⵙⴼⵓⴳⵍⵓ ⴳ ⵓⵙⴳⴳⵯⴰⵙ ⵏ 2024 ⵙ ⵜⵙⵉⵎⵔⴰⵡⵜ ⵏⵏⵙ, ⴳ ⵉⵙⵎⴰⵍⵏ ⵏⵏⵙ ⴼⴰⵡⵏⵉⵏ".

ⵜⵙⴷⴷⵉⴷ ⴱⵓⵄⵢⵢⴰⵛ ⵎⴰⵙ ⴱⴷⴷⴰ ⵉⴳⴰ ⵓⵙⵇⵇⵉⵎ "ⵜⵉⵎⵔⵙⵍⵜ ⴳ ⵡⴰⵎⵎⴰⵙ ⵏ ⵜⴷⵉⵏⴰⵎⵉⵢⵉⵏ ⴷ ⵉⵙⴰⵡⵔⵏ ⵉⵅⴰⵜⴰⵔⵏ, ⵙⴳ ⵓⵙⵏⴰⵎ ⵏ ⵜⵏⴱⴹⴰⵢⵜ ⵖⵔ ⵓⵣⵣⵔⴰⵢ ⵉ ⵓⴷⵙⵜⵓⵔ, ⵖⵔ ⴰⵣⵣⵔⴰⵢ ⵉ ⵓⵙⵍⴳⵏ ⵏ ⵜⵡⵊⴰ, ⵙⴳ ⵉⵏⵥⵉ ⵏ ⵉⵙⵜⴰⵢⵏ ⵖⵔ ⵓⵙⵏⴰⵎ ⵏ ⵜⵣⵔⴼⵜ ⵜⴰⵏⴱⴽⴰⴹⵜ (…)", ⵜⵔⵏⴰ ⵎⴰⵙ ⵉⴳⴰ ⵓⴽⵜⵜⵓⵢ ⴰⴷ “ⴰⵙⴼⵓⴳⵍⵓ ⵙ ⵢⴰⵏ ⵓⵎⵙⴰⵔⴰⵙ ⴰⵎⵖⵔⵉⴱⵉ ⵉⵎⵉⴷⵉ, ⵙ ⵓⵙⵜⴰⵢ ⴷ ⵜⵎⵍⴰⵍⵉⵜ ⴷ ⵓⵙⵓⵖⵏ ⵏ ⵡⴰⵎⵓⵔ".

ⵜⴳⴰ ⵜⴳⵍⴷⵉⵜ ⵏ ⵍⵎⵖⵔⵉⴱ ⵙⴳ ⵉⵡⴰⵏⴽⵏ ⵉⵎⵣⵡⵓⵔⴰ ⵉⴷⵔⵓⵙⵏ ⵏⵏⵉ ⵉⵙⵔⵙⵏ ⵜⵉⵎⵔⵙⵍⵜ ⵏⵏⵙ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵏⵏⵉ ⵉⴳⴰⵏ ⴰⵙⵔⵙ ⵙⴳ ⵉⵙⵔⴰⵙ ⴷ ⵓⵙⴰⴽⴰ ⵏ ⵜⵓⵚⴽⴰ ⵏ ⵓⵏⴰⴳⵔⴰⵡ ⴰⵣⵔⴼⴰⵏ ⴰⵏⴰⵎⵓⵔ, ⵜⵉⵎⵔⵙⵍⵜ ⴳ ⵡⴰⵎⵎⴰⵙ ⵏⵏⵙ, ⵜⵔⴰ ⵜⴳⵍⴷⵉⵜ ⴰⴷ ⵉⴳ ⴰⵎⵙⵎⵓⴷ, ⵉⵙⵎⵓⵏ ⵏⴳⵔ ⵡⴰⵔⴰⵢ ⵙⴳ ⵓⵙⵔⴼⵓⴼⵏ ⴷ ⵓⴷⵔⵡⵙ ⴷ ⵜⵕⵥⵉ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ ⴷ ⵏⴳⵔ ⵓⴼⵔⴰⴳ ⴷ ⵓⵙⵓⵎⵓ ⵏ ⵓⵏⴳⵉⵙⵏ ⵉⵜⵜⵡⴰⵔⴷⴰⵢⵏ ⴷ ⵓⵙⵇⵙⵉ ⵃⵎⴰ ⴰⴷ ⵜⵉⵍⵉ ⵜⵣⵔⴼⵜ ⴷ ⵓⵙⵓⵎⵓ ⴷ ⵡⴰⴷⴷⵓⵔ ⴷ ⵏⴳⵔ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵉⵏⴷⵉⵜⵉⵏ ⵏⵏⵙ ⵜⵉⵎⴰⵣⵉⵖⵉⵏ, ⴰⴷ ⵜⵏⵏⴰ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ.

ⴷⴷⴰⵡ ⵏ ⵜⵎⴰⵜⴰⵔⵜ "35 ⵏ ⵓⵙⴳⴳⵯⴰⵙ: ⵉⵣⵔⴼⴰⵏ. ⵜⵉⴷⵔⴼⵉⵏ. ⵜⴰⵎⵢⴰⴳⴰⵏⵜ." ⵔⴰⴷ ⵉⵙⴼⵓⴳⵍⵓ ⵓⵙⵇⵇⵉⵎ ⵙ ⵓⴽⵜⵜⵓⵢ ⴰⴷ ⴳ ⵓⵣⵎⵣ ⵏ 2025, ⴳ ⵓⵎⵏⵉⴹ ⵏ ⵓⵙⵓⵖⵏ ⵉⵕⵚⴰⵏ ⵙ ⵓⵣⴷⴰⵢ ⵏ ⵓⵙⴽⴰⵔ ⵏ ⵜⵙⵎⵉⴳⴰⵍ ⵏⵏⵙ ⵜⵉⴷⵙⵜⴰⵔⵉⵏ ⴳ ⵡⴰⵔⴰⵢ ⵙⴳ ⵜⵕⵥⵉⵢⵉⵏ, ⴷ ⵓⴼⵔⴰⴳ ⵏ ⵓⵏⴳⵉⵙⵏ ⵉⵜⵜⵡⴰⵔⴷⴰⵢⵏ ⴷ ⵡⴰⵏⵏⴰⵍ ⵏⵏⵙⵏ, ⴷ ⵜⵏⴽⵔⴰ ⵙ ⵜⵓⵙⵙⵏⴰ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵎⴰⴷ ⵉⴷⵔⵓⵏ ⴳ ⵓⵣⴷⴰⵢ ⵏ ⵓⵙⴷⵓⵙ ⵏ ⵓⵡⴰⵏⴽ ⵏ ⵓⵣⵔⴼ ⴷ ⵓⵙⵍⴳⵏ, ⵉⵙⴷⵓⵙ ⵜⴰⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴷ ⵜⴷⵔⴼⵉⵏ, ⴳ ⵓⵙⴰⵜⵉ ⵏ ⵜⵙⵉⵎⴰⵏⵜ ⵉⴱⴷⴷⵏ ⵅⴼ ⵓⵙⵍⴳⵏ ⴷ ⵓⴷⵓⵙⵜⵓⵔ, ⵉⵙⵜⴰⵍ ⵜⵜ ⵢⴰⵏ ⵓⵏⴰⴳⵔⴰⵡ ⴰⵏⵎⵜⵜⴰ ⴰⵎⵜⵜⴰⵖⴰⵍ.