ⵙ ⵜⴼⵔⵉⵙⵜ ⵏⵏⵙ ⴰⵎ ⵜⵏⵙⵙⵉⵅⴼⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵕⵥⵎ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵙⵙ ⵏ ⵓⵙⵉⵏⴰⵙ 29 ⵉⴱⵔⵉⵔ ⵉⵣⵔⵉⵏ, ⵢⴰⵏ ⵓⴱⵔⴳⵔⴰⵡ ⴰⴳⵔⴰⵖⵍⴰⵏ ⵅⴼ ⵓⵙⵏⵜⵍ "ⴰⵎⵓⵜⵜⵉ ⴰⵏⴼⴳⴰⵏ ⴷ ⵉⵣⵔⴼⴰⵏ ⵏ ⵓⴼⴳⴰⵏ", ⴳ ⵓⵙⴰⵜⵉ ⵏ ⵓⵙⵙⵏⵜⵉ ⵏ ⵓⴳⵔⴰⵡ ⴰⵎⴰⵜⴰⵢ ⵏ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏⵏⵙⵏ ⴳ ⵜⵎⵏⵥⴰⵡⵜ ⵜⴰⵎⵉⵔⵉⴽⴰⵏⵜ (RINDHCA), ⵙ ⵜⵉⵍⵉⵜ ⵏ ⵉⵎⴷⵔⴰⵡⵏ ⵉⵏⵎⵜⵜⴰⵏ ⴷ ⵉⴳⵏⵙⴰⵙ ⵅⴼ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⴷ ⵡⴰⵎⵓⵏ ⵓⵖⵔⵉⵎ.

ⵙ ⵓⵣⵎⵣⵣⵓ ⴰⴷ, ⵜⵙⵙⵉⴷⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵅⴼ ⵜⵏⵥⴰⵕ ⵜⵉⵜⵔⴰⵔⵉⵏ ⵉⵣⴷⵉⵏ ⵙ ⵜⵎⵣⵡⴰⴳⵜ ⴷ ⵜⵉⵍⴰⵍⵜ ⵜⴰⵏⴰⵎⵎⴰⵙⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵙⵉⵍⴰⵡⵜ ⵏ ⵉⵙⴰⴷⵎⵔⵏ ⴷ ⵜⵙⵔⵜⴰⵢ ⵏⵏⵉ ⴷⴰⵔ ⴰⵣⴷⴰⵢ ⵜⵙⴷⴷⵉⴷ ⵎⴰⵙ "ⵉⴷⴷⵔ ⵓⵎⴰⴹⴰⵍ ⵢⴰⵜ ⵜⵉⵣⵉ ⵉⵀⵔⵛⵏ ⵉⵜⵜⵡⴰⵙⵙⴰⵏⵏ ⵙ ⵜⴽⵔⵙⵉ ⵊⵊⵓ ⵜⵜ ⵉⵏⵏ ⵉⴽⴽⴰⵏ ⴳ ⵜⵎⵙⴰⵔⵉⵏ ⵏ ⵜⵎⵣⵡⴰⴳⵜ, ⴳ ⵡⴰⵎⵎⴰⵙ ⵏ ⵜⴰⵙⵙⴰⵙⵉⵏ ⵏ ⵓⵏⴳⵉⴳⵜ ⴷ ⵉⵎⵏⵖⴰⵏ ⵉⵎⴰⵍⴰⴼⵏ ⴷ ⵡⴰⴷⴷⴰⴷⵏ ⵉⵏⴼⴳⴰⵏⵏ ⵓⵣⴷⵉⵔⵏ, ⵎⴰⵢⴰ ⴰⴷ ⵉⵣⵓⵛⵛⵍⵏ ⴰⵙⵖⵓⵏ ⵏ ⵓⵙⵜⴰⵢ ⵏ ⵜⵉⵏⵏⵓⴱⴹⴰ ⵜⴰⵏⴼⴳⴰⵏⵜ ⵏ ⵜⵎⵣⵡⴰⴳⵜ ⵉⴱⴷⴷⵏ ⵅⴼ ⵡⴰⴷⴷⵓⵔ ⵏ ⵓⴼⴳⴰⵏ ⴷ ⵉⵣⵔⴼⴰⵏ ⵏⵏⵙ ⵉⴷⵙⵍⴰⵏⵏ".

ⵜⴰⵍⵍⵖ ⵎⴰⵙⵙⴰ ⴱⵓⵄⵢⵢⴰⵛ ⵜⵓⴳⴳⴰⵣ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙⵍⴰⵡⴰⵏ ⴰⴽⴽⵯ ⴰⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⴷⴷⵉⴷ ⵎⴰⵙ ⵉⴳⴰ ⵓⵎⵙⴰⵙⴰ ⵏ ⵜⴷⵔⴰⵡⵜ ⴷ ⵓⵎⵢⴰⵡⴰⵙ ⵏⵏⵉ ⵓⵔ ⵉⵍⵍⵉⵏ ⴰⵏⴰⵡ, ⵏⵏⴰ ⵉⵜⵜⵓⵙⴳⵎⴹⵏ ⴳ ⵓⵙⵖⵉⵎ ⵏ ⵜⵎⵔⵙⵍⵜ ⵜⴰⵏⴰⵎⵓⵔⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵍⵎⵖⵔⵉⴱ, ⵏⴳⵔ ⵜⵙⵇⵇⵉⵎⵜ ⵏ ⵜⵎⵜⵜⴰ ⵉⵎⵓⵏⵏ ⵉⵏⵜⴰⵢⵏ ⵙ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵉⵎⵙⵡⵓⵔⵉⵢⵏ ⴰⴽⴽⵯ ⵉⵎⵣⵡⴰⴳⵏ ⴷ ⵉⴳⵎⴰⵎⵏ ⵏ ⵜⵡⴰⵛⵓⵏⵉⵏ ⵏⵏⵙⵏ ⴷ ⵓⵥⵟⵟⴰ ⴰⴼⵔⵉⵇⵉ (ⵉⴳⴰ) ⵜⴼⵔⴽⵜ ⵜⴰⵅⴰⵜⴰⵔⵜ ⴳ ⵡⴰⵏⵏⴰⵍ ⵏ ⵉⵣⵔⴼⴰⵏ ⵏ ⵓⵙⵎⵉⵍ ⴰⴷ.

ⵎⴽⴷⴰ ⵜⵙⵙⴽⵜⵉ ⵎⴰⵙⵙⴰ ⴱⵓⵄⵢⵢⴰⵛ ⵙ ⵜⴷⵔⴰⵡⵜ ⵏⵏⵙ, ⵙ ⵢⵉⵙⵎ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴳ ⵓⵙⴳⵔⴰⵡ ⴰⵎⴰⴹⵍⴰⵏ ⵏ ⵉⵎⵣⵓⴳⵏ, ⵍⵍⵉⵖ ⵜⵙⵎⴰⵢⵏⵓ ⴰⵙⴷⴷⵉⴷ ⵅⴼ ⵓⵙⵓⵖⵏ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵙ ⵜⵙⵏⵜⴰⵢ ⵜⵉⴽⵎⴰⵎⵉⵏ, ⵙⴳⵙⵏⵜ ⴰⵏⵏⴰⵍ ⵏ ⵓⵖⴰⵡⴰⵙ ⵏ Cartagena+40 ⵏⵏⴰ ⵉⵡⴰⵜⵜⵙⵏ ⴰⴷ ⵉⵙⴷⵓⵙ ⵜⵉⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⴳ ⵜⵎⵏⴰⴹⵜ.

ⵜⵙⴷⴷⵉⴷ ⵜⵏⵙⵙⵉⵅⴼⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵎⴰⵙ ⵉⵅⵚⵚⴰ ⴰⴷ ⴱⴷⴷⴰ ⵜⴻⵜⵜⵓⵙⵡⴰⵍⴰ ⵜⵡⵓⵔⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵖ ⵓⴱⴰⵔⴰⵣ ⵖⵔ ⵓⴼⵔⵉⴷⵏ, ⵜⵉⵎⵖⴰⵔⵉⵏ ⴷ ⵉⵔⴳⴰⵣⵏ ⴷ ⵡⴰⵣⵣⴰⵏⵏ, ⵉⴹⵉⵚⵏ ⵙ ⵓⵙⵔⵉⴷ ⵙ ⵜⴰⵙⵙⴰⵙⵉⵏ ⴷ ⵓⵣⵡⴰⴳ, ⵜⵖⵔ ⵙ ⵓⵙⵖⵣⵏ ⵏ ⵜⵎⵢⴰⴷⴰⵙⵜ ⵜⴰⵖⵣⵓⵔⴰⵏⵜ ⵉⴱⴷⴷⵏ ⵅⴼ ⵜⵣⵔⴼⵜ ⴷ ⵓⵣⵔⴼ ⴷ ⵜⴱⴷⴰⴷⵜ ⴳ ⵓⵎⵢⴰⵖ ⴷ ⵜⵎⵙⴰⵔⵉⵏ ⵏ ⵜⵎⵣⵡⴰⴳⵜ.

ⵜⵙⵎⴷ ⵎⴰⵙⵙⴰ ⴱⵓⵄⵢⵢⴰⵛ ⵜⴰⴳⵓⵔⵉ ⵏⵏⵙ ⵙ ⵓⵙⵎⴰⵢⵏⵓ ⵏ ⵓⵙⵓⵖⵏ ⵏ ⵜⴰⴹⴰ ⵜⴰⵎⴰⴹⵍⴰⵏⵜ, ⵏⵏⴰ ⵜⵡⴰⵍⴰ ⵜⴰⵏⵙⵙⵉⵅⴼⵜ ⵏⵏⵙ, ⵙ ⵜⴹⴼⵕⵉ ⵏ ⵜⵙⵏⵜⴰⵢ ⵏⵏⴰ ⵉⵜⵜⵏⴼⵔⵓⵏ ⴰⴷ ⵇⴰⵎⴰⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵡⴰⵎⵎⴰⵙ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ ⵉⵥⵍⵉⵏ ⵙ ⵜⵎⵣⵡⴰⴳⵜ.

ⵉ ⵓⵙⵙⴽⵜⵉ, ⵜⵙⵏⵎⴰⵍⴰ ⵜⵎⵔⵙⵍⵜ ⵏ ⵓⵎⴱⵓⴷⵙⵎⴰⵏ ⴳ ⴱⴰⵏⴰⵎⴰ ⴷ ⵓⴱⵉⵔⵓ ⴰⵙⴳⴰⵡⴰⵏ ⵏ ⵜⵎⴰⵍⴰⵍⵜ ⵜⴰⵎⴰⵜⵜⴰⵢⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⴱⵔⴳⵔⴰⵡ ⴰⴷ ⵓⵙⵙⴰⵏ ⵏ 29 ⴷ 30 ⵉⴱⵔⵉⵔ 2025, ⵙ ⵓⵎⵢⴰⵡⴰⵙ ⴷ ⵓⵥⵟⵟⴰ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵜⵏⴽⵔⴰ ⵙ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵓⴼⵔⴰⴳ ⵏⵏⵙⵏ ⴳ ⵜⵎⵏⵥⴰⵡⵜ ⵜⴰⵎⵉⵔⵉⴽⴰⵏⵜ (RINDHCA).