ⴳ ⵢⴰⵏ ⵓⵏⵄⴰⵕ ⵉⵜⵜⵓⵙⵎⴰⵢⵏⵓⵏ ⵉ ⵓⵙⵎⴰⵢⵏⵓ ⵏ ⵓⵙⵓⵖⵏ ⴰⵖⵣⵓⵔⴰⵏ ⵙ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵙⵏⵓⴱⴳ ⵓⴳⵎⵎⴰⴹ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⴼⵙⵔ ⴰⴳⵔⴰⵖⵍⴰⵏ ⵏ ⵜⵥⵕⵉⴳⵜ ⴷ ⵓⴷⵍⵉⵙ ⴰⵙⵙ ⵏ ⵓⴽⵡⴰⵙ 24 ⵉⴱⵔⵉⵔ ⵢⴰⵏ ⵓⵏⵎⵓⵇⵇⴰⵔ ⴰⵡⵏⴳⵉⵎ ⵅⴼ ⵓⵙⵏⵜⵍ "ⵜⴰⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ: ⵜⴰⵎⵢⴰⴳⴰⵏⵜ ⵉⵜⵜⵓⵙⴹⵕⴰⵏ ⵏⵖⴷ ⴰⴱⵔⵉⴷ ⵉⵎⵏⵏⴳⵥⵉ?", ⵉⵜⵜⵓⵙⵎⵏⵉⴷ ⴳⵉⵙ ⵢⴰⵏ ⵓⴷⵍⵉⵙ ⴰⵎⴳⵔⵓ ⵢⵓⵍⵙⵏ ⴰⵙⵏⴰⵢ ⵏ ⵜⵎⵙⴰⵔⵉⵏ ⴷ ⵜⵡⵏⴳⵉⵎⵉⵏ ⵏⵏⴰ ⵉⵏⴰⵡⵍ ⵢⴰⵏ ⵓⴷⵡⴰⵍ ⴰⴳⵔⴰⵖⵍⴰⵏ ⵉⵙⵏⵎⴰⵍⴰ ⵓⵙⵇⵇⵉⵎ ⵙ ⵓⵣⵎⵣⵣⵓ ⵏ ⵓⴽⵜⵜⵓⵢ ⵡⵉⵙⵙ 75 ⵏ ⵓⵍⵖⵓ ⴰⵎⴰⴹⵍⴰⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵉⵜⵜⵡⴰⵥⵍⴰⵢⵏ ⵙ ⵢⴰⵜ ⵜⴱⵔⴰⵜ ⵜⴰⴳⵍⴷⴰⵏⵜ ⵢⴰⵜⵜⵓⵢⵏ, ⵜⴻⵜⵜⵓⵙⴷⴷⵉⴷ ⴷⵉⴷⵙ ⵜⴰⵏⴰⵎⵎⴰⵙⵜ ⵏ ⵓⵎⴹⴰⴽⴰⵕ ⴰⴷ ⴳ ⵉⵥⵕⵉ ⴰⵣⵔⴼⴰⵏ ⴰⵎⵖⵔⵉⴱⵉ ⴷ ⵓⵎⵙⴰⵔⴰⵙ ⵅⴼ ⵜⵎⵢⴰⴳⴰⵏⵜ ⵜⴰⵖⵣⵓⵔⴰⵏⵜ ⵏ ⵜⵉⵏⴷⵉⵜⵉⵏ ⴳ ⵓⵎⵏⴰⴹ ⴰⴳⵔⴰⵖⵍⴰⵏ ⴳ ⵍⵍⴰⵏ ⵜⵉⵎⴷⴼⴼⵔⵉⵏ ⵏ ⵓⵎⵏⵓⵙ.

ⵉⵜⵜⵡⴰⵙⵙⴰⵏ ⵓⵏⵎⵓⵇⵇⴰⵔ ⵙ ⵢⴰⵜ ⵜⴳⵓⵔⵉ ⵏ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⴷⴷⵉⴷ ⴳⵉⵙ ⵎⴰⵙ ⵜⴳⴰ ⵜⵖⵣⵓⵔⴰⵏⵜ ⵏ ⵉⵣⵔⴼⴰⵏ ⵜⴰⵢⴰⴼⵓⵜ ⵏ ⵓⵎⵙⴰⵙⴰ ⴰⵏⴼⴳⴰⵏ ⵉⵣⵔⵉⵏ ⵜⵉⴷⵍⵙⵉⵡⵉⵏ ⴷ ⵉⵡⵜⵜⴰ ⴷ ⵎⴰⵙ ⵜⴳⴰ ⴰⵙⵓⵖⵏ ⴰⵖⴰⵔⴰⵏ ⵉⵣⵔⵉⵏ ⵜⴰⵣⵎⵣⵜ. "ⵢⴰⵖⵓⵍ ⵓⵎⴹⴰⴽⴰⵕ ⵅⴼ ⵜⵖⵣⵓⵔⴰⵏⵜ ⴷ ⴰⵙⵖⵓⵏ ⴰⵏⴱⵣⴰⵣ ⴳ ⵓⵣⵎⵣ ⵏ ⵓⵖⵓⵍ ⴰⵣⵔⴱⴰⵏ ⵏ ⵓⵏⴰⴳⵔⴰⵡ ⴰⵣⵔⴼⴰⵏ ⴳ ⵓⵙⵡⵉⵔ ⴰⴳⵔⴰⵖⵍⴰⵏ", ⴰⴷ ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ.

ⵎⴽⴷⴰ ⵜⵙⵖⴹⴼ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵜⴰⵡⵉⵜ ⵎⴰⵙ ⴷ ⵎⵇⵇⴰⵔ ⵍⵍⴰⵏⵜ ⵜⵏⵥⴰⵕ, ⵍⴰ ⵙⵎⵏⵉⴷⵏ ⵜⵎⵓⵔⴰ ⵏ ⵉⴼⴼⵓⵙ ⵉⵎⴷⵢⴰⵜⵏ ⵉⴽⵎⴰⵎⵏ ⴷ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ ⴳ ⵜⵙⵏⵙⵉ ⵏ ⵉⵎⵏⵣⴰⵢⵏ ⵏ ⵜⵖⵣⵓⵔⴰⵏⵜ, ⴰⵢⴰ ⴰⴷ ⵙⵙⵏⵥⵉⵏⵜ ⴳ ⵓⵎⵢⴰⵖ ⵏⵏⵙⵏⵜ ⴰⴽⴷ ⵜⴳⵔⵓⵎⵎⴰ ⵏ ⵜⵎⵙⴰⵔⵉⵏ ⵜⵉⵣⵔⴼⴰⵏⵉⵏ.

ⵉⵙⵏⴼⵍⵏ ⵉⵎⵉⵣⵉⵜⵏ ⵉⴷⴷⵔ ⵓⵎⵏⴰⴹ ⴰⴳⵔⴰⵖⵍⴰⵏ, ⵜⵙⵖⴹⴼ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ, ⵙⴳⵉⵙⵏ ⴰⵙⵙⵉⴷⵔⵓⵙ ⵏ ⵉⵙⴳⵓⵎⵏ ⴷ ⵜⵎⵙⵓⵙⵜⴰⵍ ⵉⵜⵜⵓⵥⵍⴰⵢⵏ ⵉ ⵉⵎⴰⵙⵙⵏ ⵉⵣⵔⴼⴰⵏⵏ ⵉⵏⵎⵜⵜⴰⵏ, ⵓⵍⵓⵢ ⵏ ⵢⵉⵏⴰⵡⵏ ⵉⵜⵜⵎⵏⴰⵍⴰⵏ ⵉⵣⵔⴼⴰⵏ, ⴰⴱⵏⵏⵣ ⵏ ⵜⵉⵏⴷⵉⵜⵉⵏ ⵜⵉⵏⴼⴳⴰⵏⵉⵏ… ⵎⴰⵢⴰ ⴰⴷ ⵉⵙⵙⵓⵖⵏⵏ, ⵜⵔⵏⴰ, ⵜⵉⵏⵥⴰⵕ ⵜⵉⵎⴰⵢⵏⵓⵜⵉⵏ ⵅⴼ ⵜⵡⴰⵛⵓⵏⵜ ⵏ ⵉⵎⵏⵣⴰⵖⵏ/ⵜⵎⵏⵣⴰⵖⵉⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ.

"ⵏⵍⵍⴰ ⴳ ⵜⴼⵔⴽⵜ ⵜⴰⵎⴳⴷⵓⵍⵜ" ⵜⵙⴷⴷⵉⴷ ⵜⵎⵙⵜⴳⴳⴰⵔⵜ ⵜⴰⵣⵔⴼⴰⵏⵜ, "ⵉⵖ ⵓⵔ ⵏⵙⴽⵉⵔ ⵜⵉⵍⴰⵍⵜ ⵏⵏⵖ ⴰⵎ ⵉⵎⵏⵣⴰⵖⵏ/ⵜⵉⵎⵏⵣⴰⵖⵉⵏ ⵅⴼ ⵉⵣⵔⴼⴰⵏ, ⵔⴰⴷ ⵉⵜⵜⵡⴰⵔⴷⴰⵍ ⵓⵏⴰⴳⵔⴰⵡ ⵏⵏⴰ ⵜⵚⴽⴰ ⵜⵏⴼⴳⴰⵏⵜ ⴳ ⵉⵙⴳⴳⵯⴰⵙⵏ ⵏ ⵉⵣⵎⵓⵎⴳⵏ ⴷⴰⵜ ⵜⵉⵟⵟⴰⵡⵉⵏ ⵏⵏⵖ".

ⵙ ⵓⵎⵙⵍⵉ ⵏ ⵓⵏⴰⵔⵓⵣ, ⵜⵙⵎⴷ ⵜⵏⵙⵙⵉⵅⴼⵜ ⵏ ⵓⵙⵇⵇⵉⵎ ⵜⴰⴳⵓⵔⵉ ⵏⵏⵙ ⵜⵙⴷⴷⵉⴷ ⵎⴰⵙ ⴷ "ⴳ ⵓⵣⵎⵣ ⵏ ⵜⴰⵙⵙⴰⵙⵉⵏ ⵜⵉⵎⵢⴰⵏⴰⵡⵉⵏ, ⵉⵙⵓⵍ ⵖⵓⵔⵏⵖ ⵓⵏⴰⵔⵓⵣ. ⴰⵏⴰⵔⵓⵣ ⴳ ⵉⵎⴰⴷⴰⵏⵏ, ⴳ ⵉⴷⵍⵙⴰⵏⵏ, ⴳ ⵉⵄⵔⵔⵉⵎⵏ, ⴳ ⵡⴰⵣⵣⴰⵏⵏ ⴷ ⴳ ⵜⵎⵔⵙⴰⵍ ⵏⵏⴰ ⵉⵙⵜⵉⵏ ⴰⴷ ⵎⵣⵖⵏ ⵅⴼ ⵉⵣⵔⴼⴰⵏ ⵏ ⵓⴼⴳⴰⵏ".

ⵙⴳ ⵜⵙⴳⴰ ⵏⵏⵙ, ⵜⵙⵙⵉⴷⴷ ⵜⵎⴰⵔⴰⵜ ⵜⴰⴽⴰⵎⵉⵔⵓⵏⵉⵜ ⴷⵊⴰⵢⵍⵉ ⴰⵎⴰⴷⵓ ⴰⵎⴰⵍ ⵅⴼ ⵓⴷⵔⵉⵣ ⵏ ⵜⵎⴷⴼⴼⵉⵔⵉⵏ ⴰⴷ ⵅⴼ ⵡⴰⴷⴷⴰⴷⵏ ⵏ ⵜⵡⵜⵎⵉⵏ, ⵙⵍⴰⵡⴰⵏ ⴰⴽⴽⵯ ⴳ ⵜⵎⵏⴰⴹⵉⵏ ⵏ ⵓⴼⵜⴰⵙ, ⵜⵙⴷⴷⵉⴷ ⵎⴰⵙ ⵉⵙⵙⵏⵜⵉ ⵓⵙⵏⴼⵍ ⵙⴳ ⵜⴷⵍⵙⴰ ⵜⴰⵎⵓⵏⴰⵏⵜ ⵓⵔ ⴷ ⵖⴰⵙ ⵙⴳ ⵉⴹⵕⵉⵚⵏ. "ⵜⴰⵎⵖⴰⵔⵜ ⴷ ⵜⵓⵏⴳⵉⵙⵜ ⵜⴰⵎⵣⵡⴰⵔⵓⵜ ⵏ ⵜⵎⴷⴼⴼⵉⵔⵜ, ⵓⵔ ⵉⵜⵜⵡⴰⵣⵎⴰⵔ ⴰⴷ ⵢⵉⵍⵉ ⴽⵔⴰ ⵏ ⵓⵣⵣⵉⴳⵣ ⴳ ⵓⵣⵎⵣ ⵏ ⵉⵙⵍⴳⵏⵏ ⵓⵔ ⵉⵜⵜⵓⵣⵣⴳⵉⵔⵏ ⴷ ⵉⵏⴰⴳⵔⴰⵡⵏ ⵏ ⵜⵉⵏⴷⵉⵜⵉⵏ ⵉⵙⵍⵉⴷⵏ ⴰⵣⴳⵏ ⵏ ⵡⴰⵎⵓⵏ".

ⴰⵎⵓⵣⴰⵢ ⴰⴷⵎⵙⴰⵏ, ⵎⴰⵙⵙ ⴰⵃⵎⴰⴷ ⴱⵏⵎⵓⵙⴰ, ⵙⴳ ⵜⵙⴳⴰ ⵏⵏⵙ, ⵉⵙⴷⴷⵉⴷ ⵅⴼ ⵓⵙⵖⵓⵏ ⵏ ⵓⵙⵎⵀⵍ ⵏ ⵉⵣⵔⴼⴰⵏ ⵙ ⵜⵎⵔⵙⴰⵍ ⵜⵉⵎⴰⴷⵓⵙⵉⵏ ⴷ ⵜⵙⵉⵎⴰⵏⵉⵏ ⴷ ⵉⵎⴰⵙⵙⵏ ⵏ ⵓⵙⵇⵙⵉ, ⵉⵙⴷⴷⵉⴷ ⵎⴰⵙ ⴷⴰ ⵜⴻⵜⵜⵓⵙⵙⴹⵕⴰ ⵜⵎⵢⴰⴳⴰⵏⵜ ⵏ ⵉⵣⵔⴼⴰⵏ ⴽⵓⴷⵏⵏⴰ ⵜⴻⵜⵜⵓⵙⵉⴷⴼ ⴳ ⵓⵙⵉⵜⴳ ⵏ ⵜⵙⵔⵜⴰⵢ ⵜⵉⴳⴷⵓⴷⴰⵏⵉⵏ, ⴷ ⵓⵣⴷⴰⵢ ⵏ ⵜⵉⴳⴰⵡⵜ ⵙ ⵓⵙⵇⵙⵉ, ⵏⵜⵜⵏⵉ ⴷ ⵉⵎⵏⵣⴰⵢⵏ ⵉⵙⴷⵓⵙ ⵓⴷⵓⵙⵜⵓⵔ ⵏ ⵉⵣⵔⴼⴰⵏ ⵙ ⵜⵎⵢⴰⴳⴰⵏⵜ ⴰⵙⴳⴳⵯⴰⵙ ⵏ 2011 .

ⵉⵜⵜⵓⵚⴽⴰ ⵓⵏⴰⴳⵔⴰⵡ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵙ ⵓⵎⵙⴰⵙⴰ ⴷ ⵜⴳⵉⵔⴰ ⵏ ⵜⵉⵏⴰⵡⵜ, ⵅⴼ ⵜⵖⵣⵓⵔⴰⵏⵜ ⵓⵔ ⵉⵙⵢⵢⵉⵀⵏ ⴰⵙⴳⵣⵣⵎ, ⴷ ⵓⵡⵇⵇⵔ ⵏ ⵉⵎⵏⵣⴰⵢⵏ ⴰⴷ ⴷ ⵜⴰⵎⵙⵜⴳⴳⴰⵔⵜ ⵎⴳⴰⵍ ⵜⴰⵏⴼⴳⴰⵏⵜ..