ⴷⴷⵓⵃⴰ, 27 ⵎⴰⵢⵓ 2025

"ⵉⵙⵍⵍⵡⵉ ⵓⵔ ⵉⴳⵉ ⴰⵙⵜⴰⵢ"
"ⵉⵣⵔⴼⴰⵏ ⵓⵔ ⵉⴳⵉ ⵡⵉⵏ ⵓⵎⵀⴰⵡⴰⴹ"

ⵜⴷⵔⵓ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⴳ ⵓⵕⵥⵥⵓⵎ ⵎⵉ ⵢⴰⵜⵜⵓⵢⵏ ⵓⵙⵡⵉⵔ ⵏ ⵢⴰⵏ ⵓⴱⵔⴳⵔⴰⵡ ⴰⴳⵔⴰⵖⵍⴰⵏ ⵅⴼ ⵜⵖⵉⵙⵜ ⵜⵉⵎⵍⵥⵉⵜ ⴷ ⵉⵣⵔⴼⴰⵏ ⵏ ⵓⴼⴳⴰⵏ: ⵉⵣⵎⴰⵣ ⴷ ⵉⵎⵉⵣⵉⵜⵏ ⴷ ⵉⵥⵕⵉⵜⵏ ⵉ ⵢⵉⵎⴰⵍ ⴰⵎⵓⴼⴰⵢ, ⵉⵜⵜⵡⴰⵙⵙⴰⵏ ⴰⵡⴷ ⵙ ⵜⴷⵔⴰⵡⵜ ⵏ ⵓⵎⴰⵍⴰⵍ ⴰⵎⴰⵜⵜⴰⵢ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵜⵎⵜⵜⴰ ⵉⵎⵓⵏⵏ ⴷ ⵉⵎⵙⵜⴳⴳⴰⵔⵏ ⵉⵏⵎⵜⵜⴰⵏ ⴷ ⵓⵏⴱⵉⴹⵏ ⴷ ⵉⵎⵔⵙⴰⵍⵏ.

ⵙ ⵜⴼⵔⵉⵙⵜ ⵏⵏⵙ ⴷ ⵜⴰⵏⵙⵙⵉⵅⴼⵜ ⵏ ⵜⴰⴹⴰ ⵜⴰⵎⴰⴹⵍⴰⵏⵜ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⵜⵙⴷⴷⵉⴷ ⵎⴰⵙⵙⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⵎⴰⵙ ⵓⵔ ⵉⴳⵉ ⵉⵙⵍⵍⵡⵉ ⴷ ⵜⵣⵣⵉⴳⵣⵜ ⴰⵙⵜⴰⵢ ⴰⵙⵙ ⴰ, "ⵎⴰⵛⴰ ⴳⴰⵏ ⵜⴰⵡⵉⵍⴰ ⵜⴰⵖⴰⵡⵍⴰⵏⵜ", ⵉ ⵓⵙⴱⵓⵖⵍⵓ ⵏ ⵉⴼⵙⵙⴰⵢⵏ ⴷ ⵜⵏⴽⵔⴰ ⵙ ⵢⵉⵙⴽⵉⵍ ⴷ ⵉⵣⵔⴼⴰⵏ ⴷ ⵡⴰⴷⴷⵓⵔ ⵏ ⵓⴼⴳⴰⵏ.

ⵓⵔ ⴰⴷ ⵉⵣⵔⵔⵉ ⵢⴰⵏ ⵡⴰⵙⵙ ⴱⵍⴰ ⴰⴷ ⵏⵙⵍⵍ ⵉ ⵢⴰⵏ ⵓⵙⴼⵔⵙ ⴷⴰ, ⴷ ⵢⴰⵏ ⵢⴰⴹⵏⵉⵏ ⵉⵛⵏⴰⵏ ⴷⵉⵏⵏⴰⵖ… ⵙ ⵜⵡⵉⵍⴰ ⵏⵏⴰ ⴰⵖ ⵉⵜⵜⴰⵊⵊⴰⵏ ⴰⴷ ⵏⴻⵏⵏⵓⵔⵣ ⵏⵙⵇⵙⴰ ⵅⴼ ⵉⴼⵙⵙⴰⵢⵏ ⵉⵜⵜⵡⴰⵣⵎⵔⵏ ⴰⵙⵙ ⴰ. ⵉⵣⵎⴰⵣ ⵉⵏⴰⵍⴰⵡⵏ, ⵜⵔⵏⴰ ⵜⵎⵙⵜⴳⴳⴰⵔⵜ ⵜⴰⵣⵔⴼⴰⵏⵜ, ⵉ ⵢⴰⵏ ⵡⴰⵢⴷⴰ ⵉⵍⵍⴰⵏ ⵉⵙⵓⴳⴳⵓⵔⵏ ⵙ ⵉⵎⵏⵉⴷⵏ ⵏ ⵜⵏⴽⵔⴰ ⵙ ⵜⵏⴼⴳⴰⵏⵜ ⴳ ⵢⵉⵎⴰⵍ ⵉⵜⵜⵡⴰⵥⵕⴰⵏ.

ⵎⴰⵛ ⵉⴳⴰ ⵓⵙⵖⴰⵍ ⵏ ⵉⵙⵙⴰⵔⵓⵜⵏ ⴷ ⵜⵥⴹⴰⵕⵉⵏ ⴷ ⵉⵙⵓⴳⴰⵎ ⵏ ⵓⵥⴰⵕⵓⵕ (ⵉⵍⵉⴽⵜⵔⵉⵢⵏ) ⴷ ⵡⴰⵎⴰⵏ ⴷ ⵓⵙⵖⴰⵍ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⴷ ⵜⵎⴰⵇⵇⴰⵏⵜ ⴷ ⵓⵎⵍⴰⵏ ⵉⴽⵙⵡⴰⵜⵏ ⵉⵜⵜⵓⵙⵓⵖⵏⵏ ⵉ ⵓⵙⴱⵓⵖⵍⵓ ⵏ ⵉⵏⴰⴳⵔⴰⵡⵏ ⵏ ⵜⵖⵉⵙⵜ ⴷ ⵜⴱⵖⵓⵔⵜ ⵙⴳⵉⵙⵏ ⵍⴰ ⵜⵜⴰⴷⵊⴰ ⵜⴰⴽⴰⵕⴹⴰ ⵏ ⵉⵡⴰⵏⴽⵏ ⵏⵏⴰ ⵉⵣⵎⵔⵏ ⴰⴷ ⴱⵖⵔⵏ ⵙⴳ ⵉⵏⴰⴳⵔⴰⵡⵏ ⴰⴷ ⵜⵎⵥⵥⵉ. ⴳ ⵓⵙⴰⵜⵉ ⴰⴷ ⵜⵙⵙⵖⴹⴼ ⵎⴰⵙⵙⴰ ⴱⵓⵄⵢⵢⴰⵛ ⵙ ⵜⴼⵉⴽⴰⵛ ⵜⵉⵎⵓⵟⵟⵓⵏⵉⵏ ⴷ ⵉⵎⵣⴰⵔⴰⵢⵏ ⵏⵏⴰ ⵉⵣⵎⵔⵏ ⴰⴷ ⵜⵜⵓⵙⴷⵓⵙⵏ ⵙ ⵜⵡⵉⵍⴰ ⵜⴰⵅⴰⵜⴰⵔⵜ, ⵏⴳⵔ "ⵉⵡⴰⵏⴽⵏ ⵉⵙⵙⴱⵖⴰⵔⵏ ⵏⵖ ⵉⵣⵎⵔⵏ ⴰⴷ ⵙⵙⴱⵖⴰⵔⵏ ⵉⵏⵎⵓⵔⴰⵏ/ⵜⵉⵏⵎⵓⵔⵉⵢⵉⵏ ⵏⵏⵙⵏ ⵙ ⵜⵣⵣⵉⴳⵣⵜ ⴰⴷ, ⴷ ⵡⵉⵢⵢⴰⴹ ⵉⵙⵙⵓⵜⵓⵔⵏ ⴰⴱⵔⵉⴷ ⵏⵏⵙⵏ, ⴷ ⵡⵉⵙⵙ ⴽⵕⴰⴹ ⵉⵇⴰⵎⴰⵏ ⴷⴼⴼⵉⵔ ⵏ ⵓⴽⴰⴱⴰⵔ ⴰⴷ". ⵜⵉⴼⵉⴽⴰⵛⵜ ⴰⴷ, ⴰⵔ ⵜⵙⵙⵖⴹⴰⴼ, ⵜⵣⵎⵔ ⴰⴷ ⵜⵙⵙⵉⵔⵓⵡ ⴰⵔ ⵢⵉⵙⴽⵉⵍ ⵏⴳⵔ ⵉⵎⴰⴷⴰⵏⵏ.

ⵖⴰⵢⴰ ⴷ, ⵜⵖⵔ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ ⵙ ⵓⵏⴱⴰⴹ ⴰⴳⵔⴰⵖⵍⴰⵏ ⵉⵣⵣⵉⴳⵣⵏ ⴳ ⵡⴰⵎⵎⴰⵙ ⵏⵏⵙ ⴰⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵢⵉⵙⴽⵉⵍ ⴷ ⵡⴰⴷⴷⵓⵔ ⴰⵏⴼⴳⴰⵏ, ⴷ ⵓⵍⴰ ⴰⵙⴷⵓⵙ ⵏ ⵜⵎⵢⴰⴷⴰⵙⵜ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵓⵙⵖⵉⵡⵙ ⵏ ⵉⵏⴰⴳⵔⴰⵡⵏ ⵏ ⵜⵖⵉⵙⵜ ⵜⵉⵎⵍⵥⵉⵜ ⴷ ⵓⵙⴰⵏⵓⵏ ⵏ ⵡⴰⵍⴳⵓⵔⵉⵜⵎⵏ ⵏⵏⵙⵏ ⴷ ⵜⵙⵓⵜⵍⵜ ⵏ ⵜⵓⴷⵔⵜ ⵏⵏⵙⵏ.

ⵓⵔ ⵏⵔⵉ ⴰⴷ ⵏⵙⴱⵉⴹⵉⵕ ⵉⵙⵍⵍⵡⵉ ⴷ ⵜⵣⵣⵉⴳⵣⵜ, ⵜⵏⵏⴰ ⵎⴰⵙⵙⴰ ⴱⵓⵄⵢⵢⴰⵛ, ⵎⴰⵛⴰ ⵜⵉⵏⵥⴰⵕ ⴷ ⵉⵎⵉⵣⵉⵜⵏ ⴷ ⵉⵙⴷⵉⴷⴷⵉⵢⵏ ⴳⴰⵏ ⵉⵏⴰⵍⴰⵡⵏ ⴷ ⵉⵏⵎⵉⵣⵉⵜⵏ, ⵓⵔ ⵉⴷⵔⵓⵙ ⵡⴰⴷⴷⵓⵔ ⵏⵏⵙⵏ ⵅⴼ ⵡⴰⴷⴷⵓⵔ ⵏ ⵉⵣⵎⴰⵣ ⵉⵜⵜⵡⴰⵣⵎⵔⵏ…