ⵉⵙⵙⵏ ⵓⵙⵖⵉⵎ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴰⵙⵙ ⴰⴷ ⵢⴰⵏ ⵓⵙⴽⴽⵉⵔ ⵉⴼⴰⵡⵏ ⴳ ⵓⵙⴰⵜⵉ ⵏ ⵓⵙⴷⵓⵙ ⵏ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵉⵎⵣⵡⴰⴳⵏ, ⵉⵜⵜⵡⴰⵙⵎⴷⵢⴰⵏ ⴳ ⵓⵙⴳⵎⴹ ⵅⴼ ⵢⴰⵜ ⵜⵎⵢⴰⵇⵇⴰⵏⵜ ⵜⴰⵙⴰⵜⵉⵜ ⵏⵏⵉ ⵓⵔ ⵉⵍⵉⵏ ⴰⵏⴰⵡ ⵏⴳⵔ ⵜⵙⵇⵇⵉⵎⵜ ⵏ ⵜⵎⵜⵜⴰ ⵉⵎⵓⵏⵏ ⵉⵏⵜⴰⵢⵏ ⵙ ⵉⵣⵔⴼⴰⵏ ⵏ ⵇⴰⵃ ⵉⵎⵙⵡⵓⵔⵉⵢⵏ ⵉⵎⵣⵡⴰⴳⵏ ⴷ ⵉⴳⵎⴰⵎⵏ ⵏ ⵜⵡⴰⵛⵓⵏⵉⵏ ⵏⵏⵙⵏ ⴷ ⵓⵥⵟⵟⴰ ⴰⴼⵔⵉⵇⵉ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⵢⴰ ⴳ ⵓⵙⴰⵜⵉ ⵏ ⵓⵏⵎⵓⵇⵇⴰⵔ ⴰⴼⵔⵉⵇⵉ-ⴰⵏⵎⵜⵜⴰⵏ ⵉⵜⵜⵓⵙⵏⵎⴰⵍⴰⵏ ⴷⴷⴰⵡ ⵏ ⵜⵎⴰⵜⴰⵔⵜ: "ⵉ ⵜⵙⵔⵜⴰⵢ ⵏ ⵜⵎⵣⵡⴰⴳⵜ ⵉⴱⴷⴷⵏ ⵅⴼ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵓⴼⴳⴰⵏ".

ⵜⵡⴰⵜⵜⵙ ⵜⵙⵓⵔⵉⴷⵜ ⴰⴷ, ⵏⵏⴰ ⴷ ⵢⵓⵛⴽⴰⵏ ⵙ ⵜⵙⵏⵜⴰⵢⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ, ⴰⴷ ⵜⵙⵙⵉⵔⵓⵡ ⴰⵎⵢⴰⵡⴰⵙ ⴰⵏⵎⵜⵜⴰⵏ ⴷ ⵓⵙⴳⴰⵡⴰⵏ ⵉ ⵓⴼⵔⴰⴳ ⵏ ⵉⵣⵔⴼⴰⵏ ⵏ ⵉⵎⵣⵡⴰⴳⵏ/ⵜⵉⵎⵣⵡⴰⴳⵉⵏ, ⵙⵍⴰⵡⴰⵏ ⴰⴽⴽⵯ ⵙ ⵓⵙⵎⵔⵙⵍ ⵏ ⵜⴷⵔⴰⵡⵜ ⵏⴳⵔ ⵜⵙⵇⵇⵉⵎⵜ ⵜⴰⵏⵎⵜⵜⴰⵏⵜ ⴷ ⵓⵥⵟⵟⴰ ⴰⴼⵔⵉⵇⵉ, ⵙ ⵎⴰⴷ ⵢⴰⵍⵍⵏ ⴰⵣⵣⴳⵉⵔ ⵏ "ⵜⴰⵏⵜⵜⴰⵎⵜ ⵏ ⵎⵕⵕⴰⴽⵛ" ⴷ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⵉⵏⵜⴰⵢⵏ ⵙ ⵉⵣⵔⴼⴰⵏ ⵏ ⵉⵎⵙⵡⵓⵔⵉⵢⵏ ⵉⵎⵣⵡⴰⴳⵏ, ⴷ ⵓⵙⴷⵓⵙ ⵏ ⵜⵉⵍⴰⵍ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵢⵉⴳⵔ ⴰⴷ.

ⴳ ⵓⵙⴰⵜⵉ ⴰⴷ, ⵜⵙⴷⴷⵉⴷ ⵎⴰⵙⵙⴰ ⴰⵎⵉⵏⴰ ⴱⵓⵄⵢⵢⴰⵛ, ⵜⴰⵏⵙⵙⵉⵅⴼⵜ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵏⵙⵙⵉⵅⴼⵜ ⵏ ⵜⴳⵔⵓⵎⵎⴰ ⵏ ⵜⵡⵓⵔⵉ ⵉⵏⵜⴰⵢⵏ ⵙ ⵜⵎⵣⵡⴰⴳⵜ ⴳ ⵓⵥⵟⵟⴰ ⴰⴼⵔⵉⵇⵉ, ⵎⴰⵙ ⵉⴳⴰ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵜ ⵢⴰⵜ ⵜⴰⵙⵙⵓⵜⵍⵜ ⵜⴰⵏⴰⵡⴰⵢⵜ ⵖⵔ ⵓⵎⵢⴰⵡⴰⵙ ⴰⵎⵔⵙⴰⵍ ⴰⵙⵓⵍⴰⵏ ⵢⴰⵍⵍⵏ ⴰⴷⴷⵓⵔ ⴷ ⵉⵣⵔⴼⴰⵏ ⵏ ⵉⵎⵣⵡⴰⴳⵏ, ⵜⵙⴷⴷⵉⴷ ⵎⴰⵙ ⵉⴳⴰ ⵓⵏⵎⵓⵇⵇⴰⵔ ⴰⵡⴷ ⴰⵙⵓⵍⴼ ⴰⴳⵔⴰⵡⴰⵏ ⵉ ⵓⵙⵡⵉⵏⴳⵎ ⴳ ⵓⵙⴷⵓⵙ ⵏ ⵓⵎⵍⴰⵍ ⵏⴳⵔ ⵜⴰⵏⵜⵜⴰⵎⵜ ⵜⴰⴳⵔⴰⵖⵍⴰⵏⵜ ⴷ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ, ⴳ ⵓⵎⵏⴰⴹ ⴰⴳⵔⴰⵖⵍⴰⵏ ⴰⵙⵙⴰⵏ ⴳ ⵉⵍⵍⴰ ⵓⵍⵓⵢ ⴳ ⵜⵏⵥⴰⵕ ⵏ ⵜⵎⵣⵡⴰⴳⵜ ⴷ ⵉⵡⵏⵏⵉⵜⵏ ⵏ ⵓⵙⵍⵉⴷ.

ⵉⵜⵜⵡⴰⵙⵙⴰⵏ ⵓⵏⵎⵓⵇⵇⴰⵔ ⵙ ⵓⵙⵎⵏⵉⴷ ⵏ ⵓⵙⵖⵉⵎ ⴰⵎⴰⵜⴰⵢ ⵡⵉⵙⵙ 6, ⵏⵏⴰ ⵉⵥⵍⵉⵏ ⵙ ⵓⵎⵍⴰⵍ ⵏⴳⵔ ⵜⵎⵢⴰⵇⵇⴰⵏⵜ ⵜⴰⴳⵔⴰⵖⵍⴰⵏⵜ ⴷ ”ⵜⴰⵏⵜⵜⴰⵎⵜ ⵏ ⵎⵕⵕⴰⴽⵛ”, ⴷ ⵉⵙⵖⵍⴰⴼⵏ ⵙ ⵢⴰⵜ ⵜⵖⵓⵔⵉ ⵜⴰⵎⵢⴰⴽⵓⴷⵜ ⵏⴳⵔ ⵙⵏⴰⵜ ⵉⴹⵕⵉⵚⵏ, ⵎⵇⵇⴰⵔ ⵉⵎⵣⴰⵔⴰⵢ ⵡⴰⵏⴰⵡ ⵏⵏⵙⵏ ⵓⵍⴳⵉⵏ, ⵏⴳⵔ ⴰⵙⵓⵖⵏ ⵓⵍⴳⵉⵏ, ⴳ ⵡⴰⴷⴷⴰⴷ ⵏ ⵜⵎⵢⴰⵇⵇⴰⵏⵜ, ⴷ ⵜⵎⵔⵉⵙⵉⵏ ⵜⵉⵎⵅⴰⵙⵉⵏ, ⴳ ⵡⴰⴷⴷⴰⴷ ⵏ ⵜⴰⵏⵜⵜⴰⵎⵜ.

ⵉ ⵓⵙⵙⴽⵜⵉ, ⵔⴰⴷ ⵜⵙⵙⵡⵀⵏ ⵜⴰⵎⵢⴰⵇⵇⴰⵏⵜ ⴰⴷ ⵜⴰⵙⴰⵜⵉⵜ ⴰⵙⵎⵀⵍ ⵏ ⵉⵎⴰⵙⵙⵏ ⵏ ⵓⵎⵢⴰⵡⴰⵙ ⵉⴽⵎⴰⵎⵏ, ⴷ ⵓⵙⵎⵢⴰⵏⴰⵡ ⵏ ⵜⵉⵔⵎⵉⵜⵉⵏ ⴷ ⵜⵎⵙⴽⵔⵉⵏ ⵜⵉⵎⵓⴼⴰⵢⵉⵏ, ⴷ ⵡⴰⵏⵏⴰⵍ ⵏ ⵜⵎⵔⵙⴰⵍ ⵜⵉⵏⴰⵎⵓⵔⵉⵏ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴳ ⵉⴼⵔⵉⵇⵢⴰ, ⵃⵎⴰ ⴰⴷ ⵢⵉⵍⵉ ⵓⵙⴷⵓⵙ ⵏ ⵜⵣⵔⴼⵜ ⴷ ⵡⴰⴷⴷⵓⵔ ⵉ ⴰⴽⴽⵯ ⵉⵎⵣⵡⴰⴳⵏ/ⵜⵉⵎⵣⵡⴰⴳⵉⵏ, ⴱⵍⴰ ⴰⵙⴽⴰⵔ ⵙ ⵡⴰⴷⴷⴰⴷ ⵏⵏⵙⵏ ⵓⵍⴳⵉⵏ.

“ⴰⴼⵔⴰⴳ ⵏ ⵉⵣⵔⴼⴰⵏ ⵏ ⵉⵎⵣⵡⴰⴳⵏ/ⵜⵉⵎⵣⵡⴰⴳⵉⵏ ⵓⵔ ⵉⴳⵉ ⵜⴰⵥⵍⴰⵢⵜ ⵎⴰⵛⴰ ⴷ ⴰⵙⵖⵓⵏ ⴰⵏⴼⴳⴰⵏ ⴷ ⵓⵖⴰⵔⴰⵏ”, ⴰⵙ ⵜⵙⵎⴷ ⵎⴰⵙⵙⴰ ⴱⵓⵄⵢⵢⴰⵛ, ⵜⵙⴷⴷⵉⴷ ⵅⴼ ⵡⴰⴷⴷⵓⵔ ⵏ ⵉⵙⴰⴷⵎⵔⵏ ⵉⵏⴱⴷⴰⴷⵏ ⴷ ⵓⵖⴷⵉⵎⵏ ⵉⴱⴷⴷⵏ ⵅⴼ ⵓⵎⴰⵣⴰⵔ ⴰⵏⴼⴳⴰⵏ ⴳ ⵓⵎⵏⴰⵍⴰ ⵏ ⵜⴰⵙⵙⴰⵙⵉⵏ ⵜⵓⴽⵔⵉⵙⵉⵏ ⵏ ⵜⵎⵣⵡⴰⴳⵜ.